Kole Çashule: ‘Maqedonishtja është domosdoshmëri, shqipja alternativë’

Gazetari maqedonas, Kole Çashule përmes një emisioni të tij në TV Alfa ka lëshuar akuza dhe komente të forta lidhur me statusin zyrtar të gjuhës shqipe në Maqedoninë e Veriut, duke e cilësuar atë si një gjuhë të dorës së dytë dhe duke ngritur alarmin për rreziqet që sipas tij sjell përdorimi i saj në sistemin e drejtësisë.

Më poshtë komenti i tij i plotë:

“Po, edhe gjuha shqipe është zyrtare, por si e dyta – që do të thotë si alternativë, ndërsa gjuha maqedonase duhet të dihet.

Si ka mundësi që maqedonasit në Shqipëri dinë shqip, maqedonasit në Kosovë dinë shqip, maqedonasit në Bullgari dinë bullgarisht ose ata në Greqi dinë greqisht? Prandaj, të dashur bashkëqytetarë, edhe ju këtu në Maqedoni, nëse doni të mos keni pengesa për të cilat ankoheni, atëherë duhet ta dini gjuhën maqedonase.

Në Maqedoni, gjuha e parë zyrtare është gjuha maqedonase dhe pikë. Kështu shkruhet në Kushtetutë dhe në ligje. Sipas kësaj, Kushtetuta dhe të gjitha ligjet janë të shkruara në gjuhën maqedonase. Po, ato ekzistojnë edhe në gjuhën shqipe, por kushtetutëbërësit dhe krijuesit e ligjeve i kanë shkruar ato në maqedonisht, kështu që ato që janë në shqip janë vetëm përkthim.

Në një fushë të ndjeshme siç është drejtësia, çdo fjalë është e matur saktësisht në peshore. Çdo ndryshim i vogël, Çdo mosdeklarim i vogël, Çdo mospërputhje e vogël mund të ketë pasoja të paimagjinueshme. Dhe të gjithë e dimë se me çdo përkthim humbet pak nga thelbi i origjinalit.

Tani imagjinoni: merrni një ligj që është shkruar në një gjuhë, e përktheni në një tjetër dhe për shkak të ndryshimit në përkthim, ai mund të interpretohet në një mënyrë tjetër, dhe nga kjo të varet fati i dikujt para gjykatës.

Sepse nëse nesër provimi i jurisprudencës jepet në gjuhë të ndryshme me interpretime të ndryshme ligjore, atëherë avash-avash po vijmë në një situatë ku në këtë shtet do të kemi dy realitete paralele. E drejta është një gjë shumë e ndjeshme – një pikëpyetje ose një presje ndryshon një vendim gjykate, e lere më një kontekst të ndryshëm gjuhësor.

Maqedonia nuk guxon të bëhet një shtet ku ligjet secili do t’i lexojë ashtu siç i konvenon.”/INA/