Një shqiptar mes të arrestuarve në flotiljen humanitare për Gazën

Një shtetas shqiptar, pjesë e flotiljes humanitare “Sumud” që po transportonte ndihma drejt Rripit të Gazës, është arrestuar nga autoritetet izraelite, ndërsa ndodhej në ujërat ndërkombëtare.

Shqiptari i ndaluar është aktivisti Baki Goxhaj, i cili ishte pjesë e misionit humanitar që synonte dërgimin e ndihmave në Gaza, në mes të krizës së vazhdueshme humanitare në enklavën palestineze.

Pas raportimeve për arrestimin, Ministria për Evropën dhe Punët e Jashtme reagoi duke konfirmuar se është vënë në dijeni të rastit dhe se po ndjek zhvillimet përmes kanaleve diplomatike.

“Ministria për Evropën dhe Punët e Jashtme është vënë në dijeni për rastin e shtetasit shqiptar Baki Goxhaj, i cili ndodhet në bordin e flotiljes ‘Sumud’”, thuhet në reagimin zyrtar.

Sipas ministrisë, autoritetet shqiptare kanë nisur komunikimin me institucionet izraelite për të marrë informacion të plotë mbi rrethanat e ndalimit dhe për të garantuar respektimin e të drejtave të shtetasit shqiptar.

“Përmes kanaleve diplomatike, Ministria është vënë prej momentit të parë në komunikim me autoritetet izraelite kompetente për të siguruar informacion të plotë mbi situatën dhe për të garantuar respektimin e të drejtave të shtetasit shqiptar, përfshirë aksesin konsullor, në përputhje me praktikat dhe konventat ndërkombëtare”, vijon reagimi.

Ministria shtoi se çështja po ndiqet “me prioritet të plotë” dhe se mbetet në kontakt të vazhdueshëm me familjarët e Goxhajt.

“Ministria po e ndjek çështjen me prioritet të plotë dhe mbetet në kontakt të vazhdueshëm me familjarët e zotit Goxhaj, si dhe do të informojë në vijim mbi procedurat e mëtejshme që pritet të ndërmerren”, thuhet më tej.

Arrestimi i Goxhajt vjen në një moment tensioni të shtuar rreth flotiljeve humanitare që synojnë të çojnë ndihma në Rripin e Gazës, territor që ndodhet nën bllokadë detare izraelite.

Aktivistët pro-palestinezë kanë deklaruar se forcat izraelite kanë ndaluar në ujërat ndërkombëtare, në perëndim të Qipros, një flotilje me më shumë se 50 mjete lundruese që transportonin ndihma humanitare drejt Gazës.

Sipas organizatorëve të Global Sumud Flotilla (GSF), anijet janë ndaluar rreth 250 milje detare (afro 460 kilometra) larg Gazës, në atë që ata e cilësuan si “një tjetër agresion të paligjshëm në det të hapur”.

Pamjet e transmetuara nga flotilja treguan komandot izraelite duke hipur në disa prej mjeteve lundruese.

Nga ana tjetër, kryeministri izraelit Benjamin Netanyahu mbrojti operacionin, duke deklaruar se ndërhyrja kishte për qëllim të ndalte “një plan keqdashës për të thyer izolimin e vendosur ndaj terroristëve të Hamasit në Gaza”.

Muajin e kaluar, forcat izraelite ndaluan 22 anije të së njëjtës flotilje pranë Kretës. Në atë operacion u arrestuan 181 aktivistë, shumica e të cilëve u liruan një ditë më pas në ishullin grek, pas reagimeve ndërkombëtare.

Dy aktivistë – spanjolli Saif Abu Keshek dhe braziliani Thiago Ávila – u dërguan në Izrael për marrje në pyetje dhe deportim, pasi kaluan 10 ditë në ndalim.

Pas incidentit, pjesa tjetër e flotiljes u zhvendos në portin turk të Marmarisit, prej nga 54 anije u nisën javën e kaluar drejt Gazës, me mbi 460 aktivistë nga 45 vende të botës.